買Crypto前要知道的二三事
2021年5月更新: 估唔到去到 2021 年都咁多人睇呢篇 2019 寫既文。Crypto 世界好多野都變左，呢篇文亦顯得有少少 outdate。你睇完呢篇文有興趣就去 subscribe 我岩岩開既 Facebook 同 Patreon啦，我會分享多少少有關 crypto 既操作…賣廣告完畢
先旨聲明: 我唔係專家，只係講出過去用大量時間研究後既睇法，所講既野可能有錯漏，以下內容並不構成任何投資建議。不過，我承諾以下係我真誠既睇法，希望大家可以互相交流。
首先，買 Crypto 必須是閒錢
我舊老闆對閒錢既定義: 「你可以輸晒既錢」
唔係你供仔女讀書既錢，亦唔係你既養老金。你無左呢筆錢唔會死，亦唔會怨天怨地，最緊要係唔會怨我。你用黎買 crypto 既錢你預左要輸晒既，所以唔洗訓身，亦都千祈唔好訓身。
你必須接受Crypto有價值
認同同接受係兩件事。你可以唔認同一層200呎樓值400萬，但你必須接受佢係以400萬交易緊。
我係2013年做 Crypto exchange 既時候，我並唔認同 Bitcoin 有價值，我覺得 D 人用黎投機，最後一定爆煲 (股神巴菲特都係咁諗)。過左六年，BTC 個價上過又落過，但係仍未爆煲。所以，你要接受喺好多人眼中，BTC 或其他 Crypto (例如 ETH)係有其價值，而且真實地交易中。
另外，我必須指出 ETH 同 BTC 本質上係唔同既。由於智能合約可以係ETH條chain上面運行，令我認為 ETH 比 BTC 更有用處。雖然如此，ETH 都有佢既問題，你想知多 d 網上大把公開資料，唔好聽完乜功課都唔做走去 All in ETH，無人會可憐你既！
買 Crypto 要有 Crypto 既思維同世界觀
有朋友心水清，計埋數去問我 Compound 收7厘息既計法:
喺 MyETHShop 用港幣買入 DAI。買入價 8.2586，賣出 HKD 7.8785，假設 Compound 做到 7.16 厘息存一年，做100,000 港幣，((100000/8.2586)*1.0716)*7.8785=102,247.07，實際上年利率只得 2.4%。
呢個計法係啱既，成日兌換係會輸買賣差價，情況就等同你不斷唱港紙美金來來回回，都會輸到你訓低。
不過，咁既諗法有以下思考盲點：
盲點1: 你仲係想用港幣去換 Crypto
無可否認，用港幣換Crypto係最快捷既方法，大部分人包括我都係咁做。不過，快捷通常唔會平，你諗下撘的士同巴士既分別就知道了。另外，我係唔會直接買 DAI 既，我會買 ETH 先再轉。（又話唔好成日轉，會輸買賣差價? 一陣再解釋)
咁，點先可以用「靚價」買到ETH？有兩個方法：
- 善用 ETH 既波幅同埋限價盤(Limit Order)。例如Coinbase做緊HK$1300/ETH，MyETHShop買入價做$1350，你可以落定$1300限價盤去試下執唔執到平貨。佢落左 $1300 之後彈番上1350 你就快手轉做 DAI 啦。
- 長遠黎講，你應該諗下點樣可以儲到多 d ETH。例如: 收取 ETH 作為酬勞。當然，你喺香港想搵一個僱主出糧出 ETH 基本上係無可能。所以，要諗下其他方法，例如直接開間網店，淨係收 ETH，去服務全球楂住ETH/DAI呢個社群。呢個方法難好多，亦都唔快捷，不過係身體力行既表現，同時壯大左成個 ecosystem。如果每個人都咁做的話，明天我們就不用使用港幣了。我自己就密鑼緊鼓為 Robocarstore.com 加入 Crypto 付款。
盲點2: 你硬係唔捨得港幣，想將 Crypto 變番做港幣
想將 Crypto 換番港幣係人之常情，因為我地每日都需要港幣去生活。不過，如果呢 d 係閒錢，你就唔會成日諗換番佢做港幣。你唔換，自然唔會輸差價。
Crypto 既風險
負責任少少，等我都講下風險
最大敵人係政府
各國政府會全面打擊。點解？ 你以為係因為好多人部電腦中左 ransomware 要交贖金，所以要打擊？你唔好咁天真啦，政府先無咁正義同埋勤力，否則呢個世界仲點會有毒品？俾各國政府打擊晒啦。去中心化最勁既野就係威脅到政府既主權，政府好多野都管唔到(因為 decentralize 晒)，無人再聽政府之笛，所以政府先全力打撃佢。
我覺得係未有 Stable Coin 出現之前，政府係無咁驚既。Stable coin 既出現激發左好多應用(例如借錢, 唔明遲 d 再講)，更多人願意去試用 Crypto。再加上Defi 既好多創新野都同傳統金融行業作對，Disruptive 到樹敵太多。
我只能夠講 Crypto 既威力非常大(你睇下 Maker 就明)，足以撼動任何一個行業，所以 Facebook Libra 先會被群起而抽之。
如果聽完令你好驚，覺得 DAI 都係好牙煙既話，你可以買 USDCoin。佢係直接由美金back 既。不過，咁即係唔信 Crypto，亦都同 decentralized 唔夾，思維仲停留喺舊世界，有咩意思呢？
另一個風險係你
現時黎講，你會有好多方法唔見左你 d coin。例如你蠢俾人呃，又或者唔記得左個 Password，唔記得 Backup 個 Wallet 之類。總之，都係你既問題，多過乜鬼野量子電腦攻破加密演算法產生既問題。
Compound 既7厘息唔係永恒
隨住 Maker 出 MCD(Multi-Collateral DAI)，或多或少都可能對 Compound 既利息有影響(你可以唔同意)。唔好以為成日都有7厘息玩，可能轉頭就變左 4 厘或更少。
有關 Wallet 既安全
我唔係 Security 既專家，如果你係行家，我更加無野教你。如果你係電腦盲，我可以俾幾個提議你：
- Wallet 可以用 Coinbase wallet。係 Coinbase wallet，唔係 Coinbase。唔好放 d coin 係Coinbase或MyETHShop度，佢地一執笠你就乜都無。
- 用 iPhone — 你有幾可聽過用 iPhone 俾人 Hack? 唔係話無，機率細好多囉。
- 用 password manager，例如 LastPass。我求下你唔好永遠用死一個 password，你 d coin 無左，呢個世界無人可以幫你救番。
- 用 Two factor，去保護你既 LastPass，Email 之類。
- 嘗試 Restore 下個 Wallet，做下Drill，睇下係咪真係Restore 到。唔好唔見左先試，你會想了結自己。
- Hardware Wallet 我試完再同大家報告。
我既玩法
我一開始係換 100美金左右既 ETH，再去uniswap換做 DAI。Uniswap 是個好東西，佢基本上係收好少差價，所以換左 ETH 先再轉 DAI 都無問題。換完 DAI 跟手放係 Compound 收幾日息。玩一陣你會慢慢開始明多少少，思維會開始改變。不過記住，用閒錢，千祈唔好訓身！幾好既理念都可以瓜柴。慢慢買，慢慢學習。
多謝你睇到呢度，鍾意既話請俾Clap支持。
